134. ทุติยสฺส โยสฺส

‘‘ทุติยา โยสฺสา’’ติ อวตฺวา ‘‘ทุติยสฺส โยสฺสา’’ติ วิสุํ กรณํ ‘‘เอกโยคนิทฺทิฏฺฐาน+มปฺเย+กเทโส+นุวตฺตเต, น ตฺเว+กวิภตฺติยุตฺตานํ’’ติ ญายา ทุติยาโยสฺสาติ นานุวตฺติย โยสฺสาติ สามญฺเญน อนุวุตฺติย เอกจฺจาทิโต ปฐมา โยสฺสาปิ เฏวิธานตฺถํฯ อิสิสฺมา ปรสฺส ทุติยา โยสฺส เฏ วา โหติฯ อิเส อิสโย อิสี, เสสํ มุนิสมํฯ

อาทิ, อาทโย อิจฺจาทิ, สฺมิมฺหิ –

55. รตฺยาทีหิ โฏ สฺมิโน

รตฺยาทีหิ สฺมิโน โฏ วา โหติฯ อาโท อาทิมฺหิ อาทิสฺมิํ, อาทีสุฯ

สมาเส อิการนฺตโต โย+สฺมิํสุ วิเสโสฯ

182. อิโต+ญฺญตฺเถ ปุเม

อญฺญตฺเถ วตฺตมานโต อิการนฺตโต นามสฺมา โยนํ โน+เน วา โหนฺติ ยถากฺกมํ ปุลฺลิงฺเคฯ อริยวุตฺติโน อริยวุตฺตโย อริยวุตฺตีฯ โภ อริยวุตฺติ อริยวุตฺตี, อริยวุตฺติโน อริยวุตฺตโย อริยวุตฺตีฯ อริยวุตฺติํ, อริยวุตฺติโน อริยวุตฺตโย อริยวุตฺตีฯ อริยวุตฺตินา อิจฺจาทิ ตุ มุนิสทฺทสมํฯ

183. เน สฺมิโน กฺวจิ

อญฺญตฺเถ อิการนฺตโต นามสฺมา สฺมิโน เน วา โหติ กฺวจิฯ อริยวุตฺติเน อริยวุตฺติมฺหิ อริยวุตฺติสฺมิํ, อริยวุตฺตีสุฯ เอวํ โตมรงฺกุสปาณิโน สารมติโน อิจฺจาทิฯ กฺวจิคฺคหณา น สพฺพตฺถ เนอาเทโสฯ

อิการนฺตํฯ